پرنٹ میڈیا

شگفتہ گمی ہوریں اک لمے عرصے توں ولایت وسدیاں نیں ،پر اوہناں دیاں پنجابی لکھتاں نوں پڑھ کے انج لگدا اے جو،جیویں اوہ پنجاب وچ وس رہیاں ہوون یا پنجاب اوہناں اندر پیا وسدا ہووے ،انج رچیاں ،مچیاں ہوندیاں نیں اوہناں دیاں لکھتاں ۔،تے ہوون وی کیوں نہ،اوہ منے پرمنے پنجابی لکھیار ،ماہر لسانیات ،سوجھوان تے کہانی کار سلیم خان گمی ہوراں دیاں اک ذہین تے نامور سپتری نیں ،جیہناں آپنی پوری حیاتی پنجاب ،پنجابی تے پنجابیت دے ودھا کھلار لئ لگا دتی۔

شگفتہ گمی ہوریں آپوں وی اک ریسرچ اسکالر ،مترجم تے ناول کار نیں ،ایس توں اڈ اوہناں دی اک کتاب "کینسر ،تے اوہدیاں قسماں" دے ناویں نال وی چھپ چکی ہے ،میری آپنی سوچ ایہ اےجو پنجابی زبان دی امیری لئ اجیہے وکھرے ،ودھیا تے نویکلے موضوعات اپر لکھن دی وی ڈھیر لوڑ اے تاں جو پنجابی زبان وچ چنگیاں کتاباں دا وادھا کیتا جا سکے،انج ای اوہناں اک ہور ودھیا کتاب پنجاب دیاں لوک گیتاں تے رسماں بارے وی لکھی اے،جمن توں مرن تیک پنجاب وچ ہوون والیاں رسماں ،ریتاں تے اوہناں بارے بنے جڑے گاؤن ،پنجاب دے کلچر تے سبھیاچار توں دنیا بھر دیاں لوکاں نوں جانو کرواؤں لئ ایس توں سوہنا تے ودھیا کم کیہ ہووے گا ۔اوہناں جی ایس سدھو ہوراں دی اہم موضوع اپر آدھار کتاب"پنجاب تے پنجابی" دا اردو ترجمہ وی کیتا اے ،جامعات وچ کھوج کاری بارے وی لکھیا اے ۔

اج کل اوہ دو ہور اہم مدیاں اپر کم کر رہیاں نیں ،جیہناں وچوں اک تے بابا گورو نانک ہوراں دے مسلمان سنگی تے ربابی بھائی مردانہ بارے کھوج بھری کتاب اے،تے نال ای اوہ "پنجابی فلم دا ارتقاء" دے ناویں نال ودھیا کم کر رہیاں نیں ،

جھلی اک پورے عہد دی داستان اے جیہڑا ساڈی نسل نے جھلیا. اوہدے سارے کردار جیوندے جاگدے تے ہالی وی relevant نیں.

کڑی منڈا تے اوہدے ماپے، ترقی پسند تے غیر ترقی پسند، سچے تے منافق، پیار کرن والے تے دھوکا دین والے، اے سارے لوکیں ہالی وی ساڈے آلے دوالے نیں. پر اوہ درخت نئیں رہیا جدے آگے جا کے جھلی اپنے دکھ دا ویروا کر دی سی.

شگفتہ گمی نے ایس ناول نوں دل نال لخیا اے تے انج لگدا کہ جیویں جھلی اوہ آپ اے تے سانوں اپنی کہانی سنا رہی اے.. اوہدا اے ناول آون والے کئی زمانیاں لئی relevant رہوے گا

ایتھے یو کے دے ادبی اکٹھاں وچ شگفتہ گِمی لودھی نال ملاقات ہوندی رہندی اے۔ ادب تے ہور موضوعات بارے مینوں اوہدے وچار جانن دا موقع ملیا اے۔ اوہ ماں بولی پنجابی دی سچی سیوک اے۔

شگفتہ بزرگاں دا بہت آدر کردی اے۔ میں اوس دیاں لکھتاں پڑھیاں نیں، شاعری تے ناول وی۔ اوس دا ناول "جھلی" ترقی پسند ادب دا بہترین نمونہ اے۔

ایس ناول وچ لہندے پنجاب اندر سوشلسٹ لہر دا جو جھلکارا وکھایا اے، اوہ حصہ مینوں بہت پسند آیا۔ ناول وچ اسلم نام دا پاتر اوس ویلے دے کامریڈاں دی سچی تصویر پیش کردا اے۔

شگفتہ گمی لودھی ہوری ساڈے سمیاں دی اک اہم لکھاری نیں۔ اوہناں نے بہت گھٹ عرصے وچ ادب دے پِڑ وچ اپنی تگڑی پچھان بنائی اے۔

میں اوہناں دا ناول "جھلی" پڑھیا اے۔ ایہہ ناول پنجابی معاشرے وچ عورت دی اصل زندگی دا اک سچا تے دردناک نمونہ پیش کردا اے۔

نول دی مکھ پاتر فردوس اجیہی عورت اے جیہنوں پڑھی لکھی تے قابل ہون دے باوجود بے توقیری دا ساہمنا کردی اے۔